Núna erum við að vinna í að gera “lyp-sync” á teiknimyndina okkar, þ.e. láta varir hreyfast með talinu. Jeff sagði okkur skemmtilega sögu frá því þegar hann vann hjá Pixar þá fór hann eitt skiptið í eitthvað fylki og eyddi á vegum Pixar einni helgi með öllum heyrnarlausum nemendum fylkisins í að kenna þeim að búa til teiknimyndir og sýna þeim Pixar teiknimyndir.
Hann fékk tölvupóst stuttu síðar frá einum foreldranum sem sagði honum að heyrnarlaus börn væri afskaplega hrifinn af myndum frá Pixar því þau gætu lesið af vörum persónanna það sem þau segja. Segir meira en mörg orð um það hvað Pixar leggur mikla vinnu í smáatriði.

Það hefur lítið heyrst af okkur Hjölla hérna undanfarið og er það að hluta til vegna anna í skóla ásamt samkvæmislífi síðustu helgi. Skólinn gengur vel, Hjölli er reyndar ekki alveg sáttur með hvað hægt gengur í hans kennslu vegna þess að 1-2 nemendur eru seinni en aðrir en hann er samt að læra helling og það er það sem skiptir máli.

Ég er ekki aðeins að læra um animation í mínum bekk heldur hefur Jeff kennt okkur teikningu og það sem skiptir máli í leiklist. Við tókum heilan dag um daginn þar sem breskur leikhúsleikari kom, að nafni Richard Knight (http://mimethegap.com), og var með bekkin allan daginn að kenna okkur látbragðsleik og ýmislegt sem viðkemur leiklistinni. Allan daginn þufti maður að fara fyrir framan bekkinn hvað eftir annað og leika eða láta eins og kjáni og var þetta eins og heill dagur í samkvæmisleikjum. Í lokin höfðum við 10 mínútur til að semja leikrit í anda Commedie del’arte sem er tegund af leik þar sem allt er ýkt út úr korti og notast er við grímur til að túlka þekktar persónur úr þessu leikformi.
Það var frekar erfitt að takast á við þetta verð ég að játa en ætli stirðbusalegur og lokaður Íslendingaþurs hafi nú ekki bara gott af þessu? Ég held það bara.

Hérna vorum við í leik þar sem notast var við hvítar grímur og nemendur áttu að stilla sér upp eins og um fjölskyldumynd væri að ræða og reyna að túlka einn fjölskyldumeðlim án tals og restin af bekknum átti að giska á hvaða persóna þetta væri (ég ákvað að leika snobbaðann frænda).

Lokaverkefnið mitt mjakast sem felst í því að taka kvikmyndabút, eða tal úr kvikmynd réttara sagt, og setja það í nýjan búning í teiknimynd. Ég tók fyrir kafla úr Princess Bride og gleð þar sennilegast Halla vin minn ásamt því að ná að gleðja Búrkna líka með því að nota staðlaða grímu-með-gleraugu-nefi-og-yfirvaraskeggi grímu, sem hann hefur ákaflega gaman af. Ég set inn lokaútkomuna í lok næstu viku.

Við fórum í grillveislu til bekkjarfélaga Hjölla á laugardaginn sem er frá Sviss. Hann er að leigja lengst úti í rassgati og tók það okkur um klukkutíma að komast á staðinn. Eftir grillið fórum við á bar sem hann var búinn að sérvelja þarna í hverfinu og reyndist hann ansi fámennur. Eftir fyrri leikinn fórum við í annað hverfi þarna nálagt þar sem Graham, sem var þarna með okkur, gekk í háskóla á yngri árum og kynnti hann okkur fyrir helstu börum staðarins. Ágætt kvöld sem endaði nærri því illa þegar reiðhjólamaður hjólaði á Graham á fullri ferð þegar við vorum á leið heim en sem betur fer sluppu þeir með mikil meiðsli.

Læt nokkrar myndir fylgja ykkur til yndisauka:


Greham að búa til heimatilbúna hamborgara og gestgjafinn (vélaverkfræðingur en furðu heilbrigður að öðru leiti) spaugast við Hjölla.

Umvafinn fallegum svanasöng í Hyde Park á sunnudaginn.

Læt þetta duga í bili.

Námskeiðið sem ég er á hérna hjá Escape Studios er að þjálfa okkur í að gefa persónum líf, þ.e. “Animation” eða kvikun eins og það kallast víst á íslensku. Við höfum síðustu vikurnar verið að gera ýmis verkefni og hef ég að ég held þegar sett 1-2 kvikmyndir hérna inn. Næstu þrjár vikurnar fara í það að gera lokaverkefni og þurftum við að velja okkur c.a. 10 sekúndna tal úr bíómynd og búa til þrívíddarteiknimynd í kringum talið, samt án þess að herma eftir myndinni.

Ég ætla að taka hina stórgóðu setningu úr Princess Bride þar sem aðalhetjan hittir morðingja föður síns og segir þetta fyrir bardagann: “My name is Indigo Montoya, you killed my father, prepare to die!”

Ég er með hugmynd að láta hnugginn, lítinn mann ganga inn í réttarsal. Þar situr dómarinn sem horfir reiðilega á manninn og gefur honum fingramerki  að hann sé dauðans matur með því að strjúka puttanum um háls sér. Þegar hinn meinti glæpamaður síðan er sestur stendur dómarinn og hallar sér fram og segir setninguna að ofan og ber hamrinum í borðið. Jafnvel gæti hann verið með gerviskegg, svona nef, skegg og gleraugu eins og hægt er að kaupa í partíbúðum og taki það af sér áður en hann segir setninguna.

Við munum leika atriðin á videovél í byrjun næstu viku til að hjálpa okkur við að kvika þetta - á þriðjudaginn verðum við allan daginn í leiklistar- eða látbragðsnámskeiði og þurfum að teikna upp myndina.

Talandi um teikningar þá fór allur föstudagurinn hjá okkur í að teikna lifandi módel. Það var virkilega skemmtilegt og mun ég örugglega reyna að bæta mig á þessu sviði og fara að teikna reglulega - hvað er meira töff en að mæta myndavélalaus í partí og henda bara í nokkrar myndir?

Ég var mjög slakur í teikningunni snemma um daginn eins og þessar myndir klárlega sýna framá:

Eftir að hafa meðtekið leiðbeiningar Pixar Jeffs um hvað beri að horfa á og hvernig maður eigi að nálgast það að teikna myndir fór að koma mynd á þetta hjá mér og kom ég eiginlega sjálfum mér á óvart þótt mér sé næstum alveg hætt að takast það. Nemendurnir í bekk Hjölla reyndar trúðu ekki að ég hefði teiknað þetta.

Hér er síðan mynd af listamanninum að skrifa þetta blogg:

Krabbi: Þú þarft ekki fara á námskeið til að að læra heilan helling. Þú sogar í þig umhverfið, og áður en þú veist ertu orðinn einn af þeim sem vita og kunna allt.

Það kemur nú ekkert á óvart hérna nema kannski þetta með námskeiðið - á ég þá bara að hætta og fara aftur til Íslands?

Gary skólabróðir minn hérna í Escape á margt sameiginlegt með mér. Hann er ekki bara fjallmyndalegur og skarpari í hugsun heldur valdi hann nákvæmlega sömu kúrsa og ég svo við höfum því verið í sama bekk þessi tvö námskeið. Við ákváðum síðan báðir að taka aukaviku hérna og taka Renderman námskeið eftir námskeiðið. Hann er með sömu pælingar og ég (og Hjölli) hvað hann vill gera eftir námskeiðið, þ.e. gera eitthvað sjálfur frekar en að fara að vinna beint við þetta. Hann var einnig forritari á árum áður en hafði vit á því að fara út í eitthvað annað en það fyrir nokkrum árum síðan.

Það nýjasta sem er eins hjá okkur er að við í bekknum eigum að velja atriði úr einhverri bíómynd (hvað ætli það séu margar bíómyndir til og hversu mörg 10 sekúndna atriði eru í hverri bíómynd?) og við komumst að því í morgun að við völdum nákvæmlega sömu myndina og eikki bara það, sama atriðið. Fáránleg tilviljun.

Þetta er talbúturinn sem við völdum báðir, úr myndinni Princess Bride: Hljóðbútur.

Ég er að spá í að gera eitthvað öðruvísi með þetta, t.d. láta mann ganga fyrir framan dómara sem horfir illilega á hann - þegar maðurinn hefur sest rífur dómarinn skeggið af sér (greinilega platskegg) og segir setninguna í sömu andrá og hann slær niður hamrinum (aðrar hugmyndir vel þegnar).

Gary sagði að hann ætti íslenskan tvífara og mælti með því að ég færi bara út í að spila póker eins og hann, hlýt að vera góður í því.

Ég þarf að velja mér 10 sekúndna talbút úr bíómynd og búa til þrívíddarmynd af manni sem er að segja viðkomandi setningar úr myndinni. Er einhver með hugmynd um hvaða brot ég ætti að taka? Sendið mér endilega hugmyndir.

Eina hugmyndin sem ég er kominn með er Bobby DeNiro úr Taxi Driver: “Talking to me? I don’t see anybody else here!”. Vandamálið er að það þarf að taka tal úr mynd og setja það í annað samhengi, þ.e. ekki herma eftir bíómyndinni. Hugmynd væri að láta gamla og úrilla ömmu eða afa sem er með slæma heyrn segja þetta við barnabarnið. Þetta er ekki nægilega góð hugmynd þannig að ég óska eftir góðum hugmyndum.

Við Hjölli höfum haft mikið að gera undanfarið þannig að lítið hefur heyrst af okkur hérna. Siggi var hjá okkur í nokkra daga og kom hann með okkur á lokahóf fyrra námskeiðsins á föstudaginn sem reyndist hið besta djamm, eins og maður segir stundum. Á laugardaginn sáum við Ebbsfleet krýnda bikarmeistara á mögnuðum Wembley leikvanginum í norður London.

Við höfum haft magnaða kennara á námskeiðunum fram að þessu og hjölli er núna með magnaðann kennara sem heitir Nick Savy. Sá kappi hefur unnið við margar stórmyndir og þætti og módelaði t.d. Batman fyrir áhættuatriðin í Batman Begins, Harry Potta, gerði Gorillaz videoið fræga og margt fleira. Ég er bara með Pixar gaurinn.
Allur skóladagurinn hjá Hjölla (og annarra nemenda með honum í bekk) fór í að finna myndir af nöktum karlmönnum á netinu að beiðni kennarans (ætli reynslan hafi ekki komið sér vel þar?).

Í dag skráði ég mig á aukanámskeið sem mun standa í viku þannig að ég verð einni viku lengur en ég ætlaði. Það er námskeið í Pixar Renderman sem ég hef áhuga á að skoða betur. Parísarferð okkar Sonju frestast því um viku.

Er ekki málið að láta nokkrar velvaldar myndir frá helginni tala sínu máli:

Dæmigert chill - hérna erum við á púbbnum við hliðina á íbúðinni okkar.

Siggi fúll með að Haukur sé að líkja honum við Fritzl (og þá er ég ekki að tala um köttinn).

Fyrir utan völlinn ásamt Andy (frá Sviss) og Graham tjalla sem eru með okkur á námskeiðinu.

Wembley leikfangurinn er svo sannarlega stórkostlegur.

Vinnufundur.

Öfugt ræs.

Oft eru ansi flottir bílar á götunum hérna í hverfinu hjá okkur.

Eins og sést er ég orðinn vel tannaður.

Minningarreitur Díönu í Hyde Park er ótrúlega þægilegur staður.

United enskir meistarar.

Við Hjölli gengum rétt áðan út af Pizzastað í fússi án þess að borða matinn okkar. Lifi meðvitaðir neytendur!

Við Hjölli erum á kafi þessa dagana að klára módelin okkar fyrir föstudaginn en þá lýkur grunnnáminu í Escape og þá skilja leiðir, Hjölli fer í Characters og ég í Animation.

Myndavélin mín er að taka á sig mynd og svona lítur þetta út núna:

Ég á eftir að setja meiri áferð á ýmsa hluta myndavélinnar og þá aðallega á linsuna en þar þurfa að vera númer og annað slíkt. Ég hendi inn lokaútgáfunni um helgina, verður sennilega töluverðar breytingar síðustu dagana fyrir skil.

Við módeluðum Mustang flugvélar um miðja síðustu viku í skólanum og set ég hana hér inn fyrir Pálma. Við förum í það í þessari viku að gera texture og slíkt svo hlutir verði ekki svona berrassaðir. Ég nenni ekki að setja inn flugvélina fljúga framhjá myndavélinni því það tekur langan tíma að “rendera” og setja inn svo þetta verður að duga. Ég gæti sett inn önnur sjónarhorn ef áhugi er á því.

Við fengum nýjan kennara í dag - mann að nafni Jeff Pratt sem er gríðarlega öflugur kappi með góða ferilskrá. Hann vann hjá NASA í 8 ár sem geimflaugaverkfræðingur og vann síðan í 10 ár hjá Pixar þar sem hann vann að myndum eins og Toy Story I og II, Bug’s Life, Monsters og Finding Nemo.

Við gerðum m.a. plötuspilara fyrsta daginn undir hans stjórn en hann verður bara með okkur þessa viku en reyndar held ég að hann verði kennarinn minn þær 6 vikur sem taka við hjá mér þegar ég læri “Animation” en Hjölli fer í “Character design”.

Þar sem ég er búinn að gefa allan vínilinn minn þá hef ég ekkert með þennan plötuspilara að gera og hann því til sölu.

Næstu tvær vikurnar verða nokkuð skemmtilegar því nemendur áttu að finna sér hlut sem væri farið að sjá á og verkefnið er að módela hann svo hann líti út sem nánast ljósmynd. Ég ætla að taka myndavél en Hjölli smásjá.

Þá er Sonja farinn til Íslands aftur eftir skemmtilega helgi - verð að viðurkenna að það var ansi erfitt að horfa á eftir henni í lestina, erfiðara en ég bjóst við en hún kemur nú fljótt aftur til London.

Sonja heimsótti vinkonu sína á föstudeginum en við Hjölli fengum okkur tvo bjóra með krökkunum í skólanum okkar Gideon kennara en þetta var síðasta vikan sem hann verður með okkur, fáum nýjan kennara í næstu viku. Á neðstu hæð skrifstofuhússins sem skólinn er til húsa er skemmtielgur pöbb með leðursófasettum, poolborðum og ýmislegu skemmtilegu og er vaninn að safnast þar saman á föstudögum. Gideon splæsti umgang af bjór á alla nemendurna, 12 talsins um leið og við mættum niður - kom okkur skemmtilega á óvart.

Hinn ofurkurteisi og þægilegi Gideon í Escape bol.

Hérna er hluti af hópnum. Blökkumaðurinn lengst til vinstri talar lítið og það sem hann talar skilst eiginlega ekki, einhver útnára enska sennilegast. Sá með strípurnar til vinstri er sá sem kann mest og er búinn að vinna inn sér peninga fyrir lífstíð með pókerspilum. Hann og unnusta hans spurðu okkur hjölla að fyrra bragði í síðustu viku hvort við vildum kannski koma með þeim út að borða í næstu viku, kom okkur skemmtilega á óvart. Ég er þarna með bjór framaní andlitinu eins og vanalega. Við duttum í það sl. föstudag með dökkhærða gaurnum hægra megin við hliðina á mér eins og áður hefur komið fram. Sá næsti er mjög dularfullur - við höfum aldrei heyrt hann mæla orð og tók ég ekki eftir honum í lítilli skólastofunni fyrr en langt var liðið á aðra viku. Við spiluðum knattspyrnu við þann næsta í einu hádeginu í síðustu viku - skemmtilegur fír. María sú spænska er sú næsta. Gaurinn í gráu peysunni er frá Birmingham og er að ég held múhaðmeðstrúar. Gráhærði kallinn er aldursforsetinn og mjög fínn náungi. Nuff said.

Við fengum okkur að borða um kvöldið með Sonju á Tequila Tex Mex sem er hérna skammt frá “íbúðinni” okkar. Við fengum okkur kokteila eftir matinn og var kominn einhver djammglampi í augun á þeim tveimur sem mér leist ekkert á enda orðinn þreyttur. Það var þó að samkomulagi að fá okkur einn bjór fyrir svefninn á hverfispöbbalingnum okkar.

Hjölli er svo mikill stuðbolti að það þyrfti stundum að sprauta hann niður.

Uppgötvun helgarinnar var sennilegast Portobello road, en þetta er víst stærsti antikbasar í heimi ef maður á að trúa þeim sjálfum. Við Sonja hofum bæði afskaplega gaman af því að skoða svona gamla hluti og Hjölli ekki síður. Við hittum maríu skólafélaga okkar og Carlos unnusta hennar í morgunkaffi og þau gengu með okkur um Portobello fram eftir degi - Sonja fékk að æfa spænskuna sína sem var bara mjög góð verð ég að segja. Um kvöldið fórum við þrjú á sýninguna Kabaret sem var strípalingasýning hin mesta og er Hjölli þegar byrjaður að skipuleggja að fara aftur á hana - mér nægir eitt skipti.

Menningastofnanirnar British Museum og H&M voru á dagskránni í dag. Þetta er sennilegast fjórða skiptið sem ég fer á þetta safn (ekki þó allt í þessari ferð) og maður verður ekki leiður á því að skoða magnaða hlutina sem hafa verið rænt af þjóðum út um allan heim - sérstaklega er Egypska deildin í uppáhaldi hjá mér.

Hér eru nokkrar myndir frá laugardeginum:

Sonja og Hjölli fá sér snarl á einum af betri búllum bæjarins.

Ég er þarna mjög þreytulegur en það er sennilegast að hluta til útaf því að Hjölli lagði fyrir mig uppblásnu og þunnu dýnuna sína á gólfið fyrir mig og var það tilbúið þegar ég kom heim frá Liverpool stöðinni eftir að hafa náð í Sonju. Ég hélt að hann væri búinn að blása í hana og græja allt en varð hissa þegar ég lagðist til svefns hvað hún var í raun óþægileg og við gætum ekki boðið Sigga og öðrum gestum upp á þetta síðar í ferðinni. Daginn eftir kom í ljós að dýnan var vita loftlaus og ég líka eftir erfiða nótt.

Ágæt mynd af Sonju en ekkert spes af Hjölla.

Þarna erum við ofarlega á Portobello.

Gleiðlinsa fátæka mannsins.

Eftir skóla fyrr í dag settist ég eins og gott er að gera eftir erfiðan dag á klósettið þar sem ég gluggaði í bók. Bókin heitir Minnisbók eftir Sigurð Pálsson sem ég hef verið alltof lengi með og er rétt búinn með 1/3 eftir rúmlega tvær vikur en það er nú önnur saga (fer sennilega ekki nægilega oft á klósettið). Í kaflanum sem ég las talar hann um form sem hann kallar atburðaskáldskap. Það er að setja upp eitthvað skáldað dæmi um atburð sem eru skondnir. Dæmi um svona hjá honum er:

Ganga inn um aðaldyr Alþingis og biðja þingvörð mjög kurteislega að fá að tala við Lilla klifurmús. Ef þingvörðurinn kannast ekki við neinn með því nafni á að spyrja hann hvort hann sé nýbyrjaður.

Þetta er skemmtilegt form sem við Hjölli og aðrir félagar okkar notum mikið en hef ekki áður séð dæmi um það í bók, hvað þá að það sé komið nafn á það.

Ég nefni þetta því fyrr í dag fengum við Hjölli einmitt hugmynd að einu slíku dæmi þar sem við sátum í litlu herbergi í skólanum og hlustuðum á hotshot tala um kvikmyndir sem hann hefur haft yfirumsjón með tæknibrellum í, myndir eins og 10000 BC, Harry Potter (allar myndirnar), Elizabeth o.flr. hjá fyrirtæki sínu Moving Picture Company. Hann er reyndar að fara að hætta því hann er að fara að snúa sér að leikstjórn. Hann átti einn snilldar branndara þegar hann var að sýna úr myndinni 10000 BC þegar mammútar voru að draga steina við byggingu píramída:

“Maður getur lært mikið um sögu og eðli hluta í þessum bransa þegar maður er að rannsaka efni fyrir myndir - ég vissi t.d. ekki áður að mammútar hefðu verið notaðir við byggingu Píramídana!”.

Það hló enginn.

En snúum okkur aftur að atburðaskáldskapardæminu sem við Hjölli hugsuðum upp eftir þetta spjall við gaurinn sem átti sér semsagt stað í litlu herbergi og sat fólk við vegginn í tveimur röðum við vegginn sem við sátum við, semsagt fólk í einni röð fyrir framan okkur:

Spyrja hann eftirfarandi þegar opið var fyrir spurningar frá nemendum: “Hvað kostar þetta fyrirtæki þitt því við erum frá Íslandi en Íslendingar eru að kaupa upp öll merkilegustu fyrirtæki Lundúna?” og taka upp veskið í sömu andrá, rífa upp kreditkortið og skutla því á gólfið fyrir framan tærnar á honum.

Hérna kemur samantekt á nokkrum litríkustu karakterunum á námskeiðinu sem við Hjölli erum á.

Kennarinn:
Kennarinn er með eindæmum þægilegur maður með mikla breska kurteisi sem er hressandi. Hann lítur út eins og granni gaurinn í Litla Bretland þáttunum. Hann hefur unnið að mörgum spennandi verkefnum, t.d. Harry Potter Goblin of Fire o.flr. Það var skemmtilegt að sjá á vefsíðu hans að hann gerði grafíkina sem er notuð í beinum útsendingum frá Evrópukeppninni á Sky - eitthvað sem við Hjölli höfum séð nokkur hundruð sinnum. Hérna er síðan hans: Gideon

Fjárhættuspilarinn:
Hann situr við hliðina á mér, uppsperrtur og ánægður með sig enda er hann sá sem kann mest í Maya í hópnum. Hann er reyndar hjálpsamur þannig að hann er ekki illa liðinn þó hann svari öllum spurningum kennarans áður en aðrir ná að hugsa upp svör. Hann er á námskeiðinu með unnustu sinni en hann klæðist svörtum buxum með gulum dreka eftir öðru lærinu í stíl við gular strípurnar. Hann er atvinnufjárhættuspilari, spilar póker, og var á top 50 lista yfir þá í Bretlandi í fyrra sem græddu mest. Hann þarf ekki að vinna framar frekar en hann vill því hann er margfaldur milljóner takk fyrir.

Sú spænska:
María hefur búið í Bretlandi í 6 mánuði, býr hérna ásamt unnusta sínum skammt frá þeim stað sem við Hjölli leigjum í Notting Hill hverfinu. Hún er stórkostlegur listamaður eins og sést á vefsíðu hennar. Hún hefur unnið að nokkrum bíómyndum á Spáni en maðurinn hennar er líka í bransanum og vann hann að hinni rómuðu mynd Pans Labirinth sem er 55. besta mynd allra tíma samkvæmt imdb. Hún er að læra ensku en tungumálið er hennar helsti veikleiki á námskeiðinu. Maðurinn hennar er í sama námskeiði og við en er í því á kvöldin samhliða vinnu. Við Hjölli ætlum að taka Sonju með okkur næsta föstudag á kaffihús með þeim hjónakornum og mun þar reyna á spænskuna hennar Sonju. Skoðið endilega síðuna hennar: Maria

Tjallinn:
Englendingur sem situr á aftasta bekk, lítur út eins og Jamie Carracher hjá Liverpool. Við fórum með honum á skrall sl. föstudag er hann hinn vænsti piltur. Einhver á barnum var með dónaskap við mig þegar hann sá ekki til og þegar ég sagði honum frá því seinna um kvöldið sagði hann mér að ég hefði átt að segja honum það fyrr því hann hefði látið viðkomandi biðja mig afsökunar … ég held að hann hefði látið verða af því og dóninn hefði mjög líklega beðið mig afsökunar. Hann er 43 ára og hefur búið hjá foreldrum sínum sl. tvö ár til að spara fyrir námskeiðinu en það er ekki ódýrt skal ég segja ykkur. Ég ætla að gefa honum Sigur Rós diskinn þann fyrsta og disk með Megas - hann er búinn að lofa því að hlusta jafn oft á diskana.
Félagi hans er að gera góða hluti í þessum bransa en hann fór í þennan sama skóla og við fyrir um tveimur árum síðan, ekki til að læra heldur til að fá sambönd í bransann í gegnum skólann … hann er með um 2 millur á mánuði núna en vinnur reyndar 16 tíma á sólarhring.
Góður piltur sem er annt um velferð vina sinna.

Sá gamli:
60 ára gamall og situr á fremsta bekk. Hann hefur unnið sl. ár hjá ITV sjónvarpsstöðinni við að gera allskonar grafík og slíkt í kringum fréttaþætti. Það er oft mikil pressa í þessu starfi, t.d. þurfti hann einu sinni að gera grafík þar sem súmað er inn á hönd og rauð blóðkorn streyma út um sár. Hann var í að klára þetta í auglýsingahléinu áður en þetta átti að fara live svo það má ekki mikið fara úrskeiðis.

Við Hjölli fórum á svakalegt fyllerí í gærkvöldi, týndum veskjum, peningum, lyklum og símum. Við vöknuðum síðan í einhverju húsasundi í morgun, ég með glóðurauga og Hjölli búinn að skíta á sig.

Neinei, ég er nú bara að grínast.

Við fengum okkur samt í glas eftir skóla seinnipartinn í gær með nokkrum úr skólanum. Það var mjög gaman og entumst við Hjölli ásamt einum breta lengst, sátum á local pubbnum fram að miðnætti og fórum síðan heim.

Sem betur fer var Ebbsfleet leiknum, sem við ætluðum að fara á í dag, frestað.

Guinnes Red er fáránlega góður bjór … ef þið mynduð smakka hann yrðuð þið líka alkar …